Daikh Masti Wajood Ki Mere

Daikh masti wajood ki mere,
Ta-abad dhoom mach gayi mere.

Tu tawwajo idhar kare, na kare,
Kam na hogi supurdagi mere.

Dil mera kab ka ho chuka patthar,
Maut to kab ki ho chuki mere.

Ab to barbad kar chuke, ye kaho,
Kya isi mein thi behtari mere?

 Mere khush-rang zakhm daikhte ho,
Ya’ani paRhtey ho shayeri mere?

Ab teri guftugu se mujh pe khula,
Kyun tabiyat udaas thi mere?

Zindagi ka ma’al itna hai,
Zindagi se nahin bani mere?

Chaand hasrat-zada sa lagta hai,
Kya wahan tak hai roshni mere?

Ab main har baat bhool jata hoon,
Aisi aadat na thi…K thi mere?

Mairi aankhon mein aa ke baith gaya,
Shaam-e-furqat ujaar di mere.

Pehle seene mein dil dharakta tha,
Ab dharakti hai be-dili mere.

Kya ajab waqt hai bicharney ka,
Daikh rukti nahi hansi mere.

Khud ko maire supurd kar baitha,
Baat tak bhi nahi suni mere.

Tere inkaar ne kamaal kiya,
Jaan mein jaan aa gayi mere.

Main to pal bhar nahi jiya ‘Irfan’,
Umr kis ne guzaar di mere.

 - Irfan Sattar